Friday, September 23, 2011

قصيدة في حب العسكر

قصيدة في حب العسكر
لكاتبها

انا مصري حر مايهمنيش
حكم العسكر مايخوفنيش
ومش هاتشتم ومش هاتضرب
ومش هاتذل ومش هاتهان
انا مصري حر انا انسان
كرامتي غالية و تمنها اللومان

في التحرير انا شفت جمال
شايلة سيوف وراكبها بغال
والعسكر واقفة نافشة الريش
مستنية تحيي اللي يعيش
مات الملك ولا يعيش؟
لأ
.....
مات الملك وبرضه يعيش
بيروح ملك وبييجي ملك
بنفس الغبا و نفس الخنوع
نفس الطؤاري ونفس السجون


انا مصري حر بس عقلي طار
دم وقدمت كبار وصغار
هتفت وغنيت و عملت زار
والعالم شهد شهدائي أبرار
والكل انبهر وأشاد وأشار
وفي الآخر فضللي عفار ودمار
ولو جيت وقلت كفاية جنان
يردوا الفلول عميل جبان
لا مش عميل انا انسان


انا مصري حر وتعبت كتير
صبرت ونلت ثورة واثير
خلعت غفير و جالي غفير
قاللي طؤاري قلت محال
قاللي أهدي قلت اتشال


انا مصري حر وبعقلي اختار
ريس يكون من الاحرار
لا عايزه شيخ ولا عايزه غفير
انا بس نفسي يكون امير
يخاف من ربه في يوم الدين
ويحمي العاجز و المسكين
واهم صفاته ... يكون امين

2 comments:

lasto adri said...

حلوة.. بالذات عجبني الفقرة الأولى اكتر واحدة.. يعيش الملك ولا يموت..
طبعا عايز شغل ع الوزن شوية.. بس وصلت احساسك :(استمر

lasto adri said...

:) *